МБНЭ-ийн Дээд цэцийн гишүүд Дорноговь аймагт ажиллаж, тэнд амьдарч байгаа Удган, зайран, шүтлэгтэн олонтой уулзалт ярилцлаа. Монгол Улсын аймгуудаас үлдээд байсан хоёр аймаг болох Дундговь, Дорноговь аймагт МБНЭ-ийн бөөгийн хүрээлэн байгуулагдлаа.
Дорноговь аймаг өвөрмөц онцлогтой. Өнгөрсөн зуны улиралд олон бөө шинээр төржээ. Тиймээс бөөгийн талаар ихээхэн сонирхож байгаа энэ цаг үед МБНЭ-ийн Дээд цэцийн гишүүд Дорноговь аймаг, Сайншанд хотод ажиллаа. Дорноговь аймагт МБНЭ-ийн Ерөнхийлөгч Д.Жаргалсайхан, МБНЭ-ийн Дэд Ерөнхийлөгч, Монгол бөөгийн Дархан удган Д.Батчулуун, МБНЭ-ийн Дэд ерөнхийлөгч, Монгол бөөгийн дархан удган Д.Энхжаргал, МБНЭ-ийн бага хуралдайн гишүүн, Монгол бөөгийн Зайран Цогбадрах, Н.Нарангэрэл, Тулгаа, Мөнхчулуун нар ажилласан юм.
Сайншанд хотын төмөр замын соёлын төвд оройн 18.00 цагаас эхэлсэн уулзалт ярилцлагыг МБНЭ-ийн Ерөнхийлөгч Д.Жаргалсайхан нээж, МБНЭ-ийн байгуулагдах болсон шалтгаан, өнөөгийн байдал, цаашдын төлөв байдлын талаар мэдээлэл хийсэн юм.
Цугласан олон уулзалт цагаа олж хийгдэж байгааг тамдэглэхийн зэрэгцээ өөрсдийн сонирхосон асуудалд хариулт авч санал бодлоо чөлөөтөй солилцлоо.
Иргэд Дорноговь аймагт уран олдворлож байгаа тухай ярьж, байгаль орчин бохирдож, мал үхэж байгаа тухай яриад энэ талаар МБНЭ-ийн байр суурийг сонирхов. МБНЭ-ийн Ерөнхийлөгч Д.Жаргалсайхан “Улс орны хөгжилд байгалийн баялагаа ашиглаж хөгжих нь зайлшгүй юм. Гэхдээ баялагаа хэдийд хэрхэн ашиглах вэ гэдэг тодорхой бодлогоор зохицуулагдах ёстой юм. Уран бол стратегийн ашигт малтмал билээ. Би хувьдаа Монгол Улс нүүрсний асар их баялагтай орны хувьд энэ баялагаа эхний шатанд ашиглаж хөгжих ёстой гэж боддог. Ойрын үед ч энэ хандлага давамгайлах ёстой гэж үздэг. Ойрын 20-30 жилд бид энэ баялагт тулгуурсласан бодлого хэрэгжиж байх явцад дэлхийн цөмийн эрчим хүчний хөгжил дэвшил эрчимтэй явж илүү өндөр технологтой хөгжилд хүрэх байх аа. Тэр үед цөмийн хамгийн сүүлийн үеийн технологи ашигласан олдворлолт хийж баялагаа ашиглавал зөв зохистой мэт санагддаг. Одоо ашиглах гэж яарах шаардлагагүй гэж боддогоо хэлэв”.
Бөөлөх үед бууж байгаа “сахиус” болон “онгод”-ын тухай өөрсдийн бодлоо ярьж харилцан санал солилцлоо. Мөн бөө хүний цээрлэх зан үйлийн талаар асууж байв.