МБНЭ-ийн Ерөнхийлөгч Д.Жаргалсайхан тэргүүтэй төлөөлөл ОХУ-ын Буриадын нийслэл Улаан-Үд хотод байх хугацаандаа Бөөгийн “Дээж” байгууллагаас хийсэн Лусын тахилгад оролцлоо.
Улаан-Үд хотын өмнө зүгт байрлах “Дээж” байгууллага нь эртнээс монгол бөөгийн төлөөлөгч нартай холбоотой ажиллаж иржээ. Тус байгууллагын тэргүүн Балдахинова В.Б нь Монгол бөөгийн удган Сумьяагийн багш нь ажээ. Олон жил хамтран ажиллаж ирсэн ажээ.
Мөн Монголын бөөгийн нэртэй удган нартай уулзаж байсан түүхэн зургуудыг бидэнд танилцуулсан билээ. Үнэхээр олзуурхамаар сайхан түүх байлаа.
Буриадын “Дээж” байгууллагаас зохион байгуулж буй Лусын тахилгад оролцогчид шөнийн гурьан цагт цугларч хөдөлсөн бөгөөд наран мандахаас өмнө Лусын тахилга хийгдэж дуусдаг уламжлалтай ажээ.
Лусын тахилга оролцогчдыг ариутгахаас эхлэх бөгөөд галаа асааж, Лусдаа өргөх идээний дээжээ цунцал хэлбэрээр өргөдөг байна. Өргөж байгаа зүйлд нь загас хүртэл орсон байгаа нь өвөрмөц содон байлаа.
Лусын тахилгын дараа цугларсан олон, улаач нартай МБНЭ-ийн Ерөнхийлөгч Д.Жаргалсайхан уулзаж, Монгол бөөгийн өнөөгийн байдлын талаар дэлэгрэнгүй мэдээлэл өглөө. Ярилцлага харилцан сонирхолтой болсон тухай оролцогчид сэтгэгдэлдээ хэлсэн юм. Улаачийн талаар асуултуудад Монгол бөөгийн их зайран Д.Одонхүү хариулт өгсөн. Уулзалт, ярилцлага харилцан сонирхосон асуудлаар халуун дотно болж өнгөрлөө.
Ярилцлагын өмнө болон дараа Монгол бөөгийн хөгжил, үйл явцын талаар кино мэдээлэл хүргэсэн байна.
Д.Хүрэлбаатар
