Хатан хаан Ногук (? -1365), мөн Индёк хатан нэртэй Монголын гүнж сүүлдээ Юань гүрний уламжлалаар Гүрёогийн ноёнтой гэрлэсэн түүхтэй. Түүний монгол нэрийг Боржигин Будашири гэдэг байлаа. Тэрбээр шинэчлэгч ван Гон Мины хатан байсан юм. Тэрбээр хэдийгээр Монголын гүнж байсан ч байнга Гүрёо Улс болон хаан эр нөхрөө дэмждэг байжээ.
Тэдний дундаас үр хүүхэд төрөхгүй байсаар 15 жилийн дараа хатан бие давхар болсон ч төрөхийн хүндрэлээс болж 1365 онд нас барсан гэдэг. Түүнийг нас барсны дараа хаан Гон Мин төрийн хэрэгтээ санаа тавихаа больж энэ хариуцлагаа Буддын лам Пён Жод үүрүүлсэн байна. Харин Пён Жо 1371 онд цаазлуулж, ван Гон Мин 1374 онд нас баржээ. Энэ түүхэн хатны тухай өгүүлсэн олон ангит киног 2005 онд Солонгосын MBC телевиз "Монгол гүнжийн домог" /Shin Don/ нэртэйгээр хийж Боржигин Будашир хатны дүрд жүжигчин Сё Жи Хү тоглосон билээ.
