Монгол бөөгийн Их эрдэмтэн, Судлаач Ш.Сүхбат, МБНЭ-ийн Ерөнхийлөгч Д.Жаргалсайхан нар 2015 онд хийгдэх ажлуудын талаар санал бодлоо солилцов. 2015 он онцлоготой жил.

Эхэнд нь Мөнх тэнгэрийн үзэл санаа, бөө шүтлэг нь хүний үүсэл гаралтай зэрэгцэн тодорхойлогддог, олон улс гүрэн, нүүдэлчдийн дотроос хүч чадал, эрэмгий байдал, дайчин чанараар чухамхүү Монголчууд товойн тодорч Монголд төрт улс байгуулж, төрийн гол шүтээнээ Мөнх тэнгэрийн үзэл, бөө шүтлэг болгон дэвшүүлжээ. Энэхүү түүхэн хугацаа, өөрөөр хэлбэл Монголын төр бөөг төрийн хэмжээнд шүтэж эхэлсэний 2223 жилийг тэмдэглэх тухай ярилцлаа.
Мөн Монгол Улсад анх бөөгийн байгууллага байгуулагдсаны 20 жилийн ойг тэмдэглэх тухай ярилцлаа. Монголчууд бүхний дээр Мөнх тэнгэр байдаг, тэр бол хамгийн шүтэн бишрэх дээд үзэл, түүний дараа шашингууд эрэмблэгддэг байжээ. Тиймээс бүх шашин ижил түвшинд тавьж, тэгш хандаж, улс төрийн бодлогодоо ашигладаг байсан тухай ярилцлаа. Энэ чиглэлээр саяхан телевизэд ярилцлага өгчээ. Монголчууд эртнээс Мөнх тэнгэрийн үзэл, бөө шүтлэгийг төрийн хэмжээнд ашиглахдаа эхлээд байгаль хүн хоорондоо харьцахуйн олон далд чанарыг мэддэг байжээ. Монгол бол байгалийн асар их баялагтай орон, бас бие даасан оюун санааны дархлаатай ард түмэн. Даяаршлын эрин үед Монголыг бусдад оюун санааны хувьд, генийн хувьд уусгачихгүй авч явах тэр их номлол, сургааль Мөнх тэнгэрийн үзэлд оршиж байна.
Энэ онд Монголын бөөгийн байгууллагууд нэгдэж ажиллаж эхэлсэний 3 жилийн ой болж байна. Монголчууд гадны хэн нэгний зохиосон номлол, бүтээсэн шавар баримал, зурсан зургын өмнө залбирагчид бишээ. Монгол бөө бол олон мянган жил монгол уламжлал, оюун санааг өнөөг хүртэл тээж ирсэн биет бус соёлын өвийг тээгч билээ. Монголчуудын оюун санаанд одоо болон ирээдүйд идэвхтэй үүрэг гүйцэтгэх Монголын бөөгийн үйл ажиллагааны чиг хандлагын талаар саналаа солилцлоо. 1990 онд хүн амын нэг хувь хүрэхтэй үгүй байсан Мэнх тэнгэрээ шүтэгчдийн тоо өнөөдөр 12 хувь гэж тодорхойлогдож байна.
90-ээд онд гарсан өөрчлөлтийн үр дүнд Монгол Улсад гадаадын 30 гаруй шашины урсгал орж ирж Монголчуудын оюун санаанд өөрийн байр сууриа бэхжүүлэхээр ажиллаж байна. Энэ талаар баримтлах бодлогын асуудлаар зөвлөлдөж ярилцлаа.
Цаашид тогтмол хугацаанд уулзаж зөвлөлдөж байхаар тохиролцлоо.
Б.Банзрагч

Twitter