Нэгэн удаа Дэлдэн мэнд заарин хошуу ноёны адууг туух гэж байгаад хүрээний хиа нарт баригдаад очиход нь Дориг хиа эрүүдэж зоддог байв. Түүнээс болоод тэр хоёр өшөөтэй болсон гэдэг.

Дориг хиагийн шавь хүү гөрөөсний гуя ганзагалаад багшдаа аваачиж өгөхөөр авч яваад замдаа хадланчид дээр буухад тэнд Дэлдэн Мэнд байв. Хүүг цай уугаад мордох зуур Дэлдэн Мэнд гөрөөсний гуянд нь жатганы юм хийгээд явуулчихаж. Дориг хиа нөгөө гөрөөсний гуяыг хавтайлган шарж, дороос нь идэж суув. Мах нь шулагдах тусам жатгын юм нь үзүүр лүүгээ өгсөж байв. Дориг хиа: “Шорны үзүүрийн махыг иддэггүй юм” гээд гарган шидэж, түүнийг нь нохой аваад идэж гэнэ. Ийнхүү Дориг хиа анх удаа Мэндийн жатгаас зайлж чаджээ.

Дараа нь Дориг хиа адуучин барлагтайгаа адуугаа тууж явахдаа хэлсэн нь “Захын ганц модны сүүдэр доогуур гардаггүй юм. Наагуур гар” гээд тэр бөө модыг тойроод явчихаж.Тэр модон дээр Дэлдэн Мэндийн жатга байсан юмсанжээ. Ингэж хоёр дахь удаад жатгаас зайлжээ. Түүнд нь Дэлдэн Мэнд гурав дахь удаагаа жатга хийхэд Дориг хиагийн эхнэр өртөж нас барав. Дориг хиа ихэд уурсаж Мэндийг алах гэж очиж явтал Мэнд мэдээд эхнэртээ “Цээрийн хана босго, нохойн идүүрт шар юм хийж миний орны урд тавь” гээд өөрөө нөмөглөөд орондоо хэвтэж байв.

“Мэнд чиний амь төгслөө” гээд хутгаа шаатал онгодоос нь улаан,цэнхэр хоёр өнгийн гэрэл цувран ирэхэд нь Дориг хиагийн нүд нь солонгорон тусаад ухаан алдчихав. Сэргээд хартал хойморт нь хутга хуйларчихсан бөөн хар юм болоод хэвтэж байв. Мэнд тэр хутгыг нь аваад шувтран татаж хуучин янзанд нь оруулаад:

“Аа та хутгаа хуйлж авагтий” гээд хадаг барьж эвлэрэлдсэн гэдэг. Нас барсны нь дараа онгод шүтээний нь Ивдэд онголсон гэдэг.

Twitter