ФОТО
ВИДЕО
Толбо нуур, Өмнө голын урианхайчуудын өнө эртнээс тахин шүтэж ирсэн нутгын хайрханд тахил өргөн залбирах үйл ажиллагаа содон байлаа.
Залбирал хийх өдөр тэр хавийн урианхайчууд бүгд цугларсан байлаа. Тахилга өргөхийн өмнө өдөр хайрхадын оройгоор цас хаялсан байлаа. Энэ л өндөрлөгөөс Толбо нуур тод томруун харагдана. Монголын түүхтэй салшгүй холбоотой Толбо нуур бол баатарлаг түүхийн нэгээхэн хэсэг билээ.
Толбо нуур нь Баян-Өлгий дахь Монгол Алтайн нурууны томоохон цэнгэг уст нуур. Толбо нуур 1000-1500 метрийн харьцах өндөртэй хад асга бүхий нүцгэн уул нуруугаар хүрээлэгдэнэ. Усны хагалбар уулс эрт цагт мөсдөж хур цасаар хучигдаж байснаар барахгүй одоо хир нь Толбо-Хүнгүй (3836 м өндөр) зэрэг зарим уулын оргилд бага зэрэг үлдэгдэл мөс цас харагдана.
Толбо нуурт хэд хэдэн жижиг арал байдгаас хамгийн том нь усны мандлаас дөнгөж 4 м өндөр Гичгэний толгой бөгөөд нуурт түрж орсон хошууны үзүүр цухуйж байгаа нь тэр болно. Нуурын уулсын ам хавцлаар урссан арваад гол горхийг өөртөө нийлүүлж илүүдэл усаа Түргэн голоор Ховдын баруун гарын цутгал Өмнө голд өгөх боловч хуурай гандуу үед нуурын түвшин доошлоход ширгэж гадагш урсгалгүй болдог байна. Хэдий тийм боловч маш цэнгэг устай юм.
Цугларсан олон тахилга, залбиралын дараа тэрхэн орчинд байдаг гүн хотгорт очиж билээ. Хүн анзаарамгүй энэ хотгорт ороход зөвхөн тэнгэр харагдана. Тэрхүү хотгорт ороход эргэн тойрон орших уулын оргил ч харагддаггүй нь сонин.
