ФОТО
ВИДЕО
Хөвсгөлийн Мөрөн хүрэх замд чонотой таарсан, бид ч дурандаа буулгаж авч чадав. Намрын өтгөн манан байгалийн үзэмжийг улам тодотгоно. Аяны зам, намрын өнгө сэтгэл сэргээнэ. Бид үдэд Мөрөн хотод ирлээ.
Намрын налгар сайхан дулаахан өдөр Мөрөн хотын ард орших Дулаанхан хайрханы овоог тахих тайлгын зан үйл боллоо. Хайрханы дэргэдээс Мөрөн хот гарын алган дээр байгаа мэт тод томруун харагдана. Хот багахан утаатай болсон харагдана. Мөрөн хот улам тэлсээр өргөн газар нутгийг эзлэх болжээ.
Энэ өдөр Монгол бөөгийн их удган Жавзансүрэн шавь нарын хамт Хайрханы намрын тахилга, тайлгаа хийлээ. Монгол бөөгийн их удган Жавзансүрэн бол Хөвсгөл нуурын нэгдсэн тахилгад Галын тахилгыг толгойлон бөөлсөн туршлагатай, нутаг орондоо нэр хүндтэй удган билээ. Тэдний шавь нар халх язгуураар бөөлдөг. Тиймээс тахилга өөрийн онцлоготой өвөрмөц байлаа.
Хөвсгөл аймаг бол Дархад болон цаатан, Тува бөөгийн эртний өв уламжлалт нутаг билээ. Гэтэл энд халх онцлоготой улаач нар энд бөөлөлт хийсэн нь өвөрмөц харагдаж байлаа. Энэ өдөр тэнгэр цэлмэг, дулаахан, салхигүй сайхан өдөр байв.
МБНЭ-ийн удирдлагууд, аймгуудын бөөгийн хүрээлэнгийн удирдагч нар тахилгын явцад байж, халх бөөлөлтийн онцлогийг үзэж танилцлаа. МБНЭ-ийн удирдлагууд Хөвсгөл аймагт ажилласан эхний өдөр Дулаанхан хайрханы тахилгын үйл ажиллагаанд оролцож өнгөрүүллээ.
Б.Банзрагч
